மிருகங்களும் கானல் நீரும்



தன் மூதாதையர்களை கொல்லப்பிறந்தவன்
என்றொரு குரல் பின் தொடர்கிறது
தன் கலவியின் போது
கல்லெறிந்ததாக சீறும் ஒரு நாயின் முன்
நான் நின்றிருந்தேன்
மந்தையில் நடக்கும் ஆடு ஒன்று
விலகி வந்து என் இடுப்பில்
தன் கொம்பால் தாக்கி சென்றது
தலைக்கு மேல் காகங்கள்
கொத்திக்கொண்டே இருக்கின்றன
ஓட முயன்ற என்னை
கானகத்தின் மிருகங்கள் ஒன்றுகூடி துரத்துகின்றன
நாயிருந்த இடத்தில்
ஒரு கொழுத்த சிங்கம் என்னை
ஏறிட்டுப்பார்த்து கொட்டாவி விட்டது
மரணம் ஒரு கணம்
கானகம் பொட்டலானது
வெட்ட வெளியில் புகைத்துக்கொண்டிருக்கிறேன்
கானல் நீர் எழும்பிக் கொண்டிருக்கிறது